文章寫於2017年1月7日
2017年1月1日 (日) – DAY 1 (上) *因為太長所以分做兩篇 😛
計劃行程
![](https://www.mixchatz.com/blog/wp-content/uploads/2020/12/20170122_9bb2e77921156aa3509fJZ9QdHNfT3sU.png)
實際行程
02:30 HKG T2 -> 06:20 Jeju -> 機場櫃員機領錢 -> Four Seasons Hotel 放行李 -> 早餐: Tokyo Panya -> 樂天汗蒸幕 -> 御里牧廣場 -> 午餐: 三代湯麵會館 -> E-mart & Lotte Mart -> Four Seasons Hotel 取行李 -> Breeze Bay Hotel -> 晚餐: 烤帶魚餐廳
今次我亦用咗Google Maps嚟紀錄我去過嘅地方,大家可以入去初步了解吓再睇詳細遊記:
12月31日,當大家都準備去倒數迎接2017年嘅時候,我坐上咗往機場嘅巴士上層。時間一分一秒過,距離2017越嚟越近,當時車上只有幾丁友,上層可能包埋我同媽媽都唔夠5人。結果當然係… 搭正12點車上嘅人同我一樣都無任何反應哈。
不過其實我一直都無出街倒數嘅習慣,因為我怕多人同人逼,所以平時都係屋企過,但上年都有同朋友去尖沙咀倒數,係逼但氣氛的確係幾好。而今年變咗喺巴士上迎接2017,雖然唔熱鬧,身邊亦只有媽媽,但都係唔錯嘅經歷。
凌晨2點30分飛機起飛,坐咗3個鐘左右就到濟州啦,又嚟番呢個我9個月前先嚟過嘅地方,好熟悉嘅感覺 😀 到埗後第一件事同上次一樣,係櫃員機取款哈哈。點知上次我用嘅櫃員機今次居然未開機,要7點先開,所以我就決定先去GS25買張T-money (淨卡2500won) 俾媽媽先,因為有卡搭巴士會方便好多,唔駛數現金。
![](https://www.mixchatz.com/blog/wp-content/uploads/2020/12/20170107_31675ac02307ff0490c5MVupxfiP7rT0.jpg)
買完仲有幾分鐘先到7點,諗諗吓怕櫃員機係要職員嚟開,唔知係咪真係7點就用到,所以最後我決定用另一部啱啱見到有好似都係遊客嘅兩個女仔用過嘅機。就係上次我用嘅灰色嗰部嘅隔離、隔離再隔離嗰部 (今次無影相,唯有口述 😛 ) 佢有銀聯卡標誌的,所以大家可以放心用。睇番銀行記錄,我今次嘅韓幣匯率係153.7,都係同韓國找換店匯率差唔多啦。
跟住就係出發搭巴士啦,同上次唔同 (上次係搭600號巴士直接去西歸浦),我今次要去新濟州蓮洞附近嘅E-mart。新濟州係近機場嘅市區,所以我搭市區巴士就可以了,有好多架都得。機場嘅市區巴士站有站牌顯示咩巴士嚟緊,大家可以到時用Daum Maps查路線,睇吓嚟緊嘅巴士啱唔啱自己搭。
而我呢,因為有架500號巴士就到,查過佢亦會到蓮洞附近,所以就上咗車。但悲劇跟住就發生了… 我坐咗架反方向嘅500號 🙁 坐咗幾個站先發現,唯有死死哋氣落車搭番另一方向行嘅500號去E-mart。呢架500號,雖然同我啱啱搭嘅另一架反方向,但佢都係喺機場同一個位停車的。所以要喺度特別提大家,睇站牌有咩車嚟緊嘅同時,記住留意埋佢下一站係邊個站,咁先確保到啱方向!
終於朝住E-mart進發寄存行李啦,點知… 行到E-mart嘅時候大約8點幾,發現佢未開門,要10點先開,呢個就係無做足功課嘅後果 🙁
其實樂天汗蒸幕係可以寄存行李嘅,但我汗蒸幕完之後會再去埋漢拏山先拎番行李去城山日出峰嗰邊嘅酒店,怕汗蒸幕唔可以人走但行李留,於是即刻實行plan2,去最後一晚入住嘅酒店Four Seasons Hotel 포시즌호텔 (제주특별자치도 제주시 원노형3길 19),睇吓今日可唔可以託佢幫手寄存行李幾個鐘,而佢就真係願意俾我寄存,佢哋嘅staff都好好態度 😀
放完行李一身輕,係時候去食個早餐。本身想帶媽媽去小食店 제원분식 (제주특별자치도 제주시 신광로6길 2) 食韓國飯卷做早餐。但媽媽依家慣咗每朝一杯咖啡,所以當行過呢間有咖啡賣嘅麵包店Tokyo Panya 도쿄팡야 신제주점 (제주특별자치도 제주시 노연로 37-1; 08:30-23:00) 嘅時候,佢問我要唔要就食呢間,咁我當然奉陪啦。因為平時香港食得多麵包,我對住佢哋出嘅麵包無咩特別興趣,都係諗住是旦食。最後買咗多士同媽媽兩份食,食落發現味道又唔錯喎哈。多士中間夾住拉到絲嘅芝士,面頭係火腿加另一款唔太拉絲但重芝士味嘅芝士,香港比較少麵包鋪有賣呢款麵包,都幾特別。
![](https://www.mixchatz.com/blog/wp-content/uploads/2020/12/20170107_ddf34c156ca70abf46b3QktLYrGLMwCJ.jpg)
食完早餐其實我都算幾精神,但考慮到媽媽可能無我咁捱得,同佢商量過後,決定照去樂天汗蒸幕 롯데사우나 (6/F, 제주특별자치도 제주시 신광로 52; 桑拿6000won + 汗蒸幕2000won) 俾媽媽浸吓浴焗吓桑拿,我都可以眠一眠。
相我今次無影到,因為之前首爾都去過汗蒸幕,同嗰度無咩分別,仲比較細添。最後休息到大約11點幾就離開出發去漢拏山了。